Gedichtdetail

Hinderem Gatter

En Hirsch im Ysegatter
bim dunkle Buecheschlag –
was stoht er so verlore do
am helle Maietag?

Er hät jo z'fresse-n-i der Chripf,
er chan im Pferch sich schön ergoh,
und d’Vögel singed em umsuscht –
wott er de Früelig nid verstoh?

Bis still, du muesch nid froge,
er hät halt langi Zyt.
Wär guet, er hett de Wald nie gseh
und was drin z’luege git!
Was bringt em ächt de Wind für B’richt
dei us em chüele Tannegrund?
Es isch mer, ’s rüeffi überlut:
Chomm hei, chomm hei, de Summer chunt!

O, d’Welt ischt wie-n-en Garte,
es loht eim niene Rueh;
es gönd scho Chettleblueme-n-uf, –
was denkscht ächt du derzue?
Gäll Hirschli, wenn’s kann Gatter hett,
du fändischt dini G’spane gly!
I tät der gern e Türli uf,
denn chöntscht en Summer glückli sy.

 

« zurück